ما كتبته ماهينور المصري بعد خروجها من السجن

سنة وثلاثة شهور.. عدّوا بسرعة مش علشان السجن تجربة سهلة، بس علشان الواحد محظوظ إنه كان مُحاط بأعظم عائلة وصحاب ورفاق.. السجن أكتر مكان يقدر يقولّنا أننا في المكان الصح.. الظلم اللي الواحد شافه جوّا السجن للجنائيين والسياسيين يخلّينا نعرف أننا في الأغلب في المكان الأصح.. الدولة المسعورة اللي بتاكل ولادها علشان مصلحة السلطة عمرها ما تقدر تكمل وتقف.. في سنة و3 شهور عدد المقبوض عليهم زاد، بنشْحت على قرض صندوق النقد الدولي اللي حيخلّينا نشحت.. أسعار بتغلى، جزيرتين فجأة صحينا لقيناهم بيقولولنا مش بتاعتكم وكأننا ضيوف في البلد، مش لازم نعرف بمفاجآت السلطة.. دولار سعره بقى مش مفهوم ودولة بقت أهشّ من أي وقت بس سانّة أسنانها علينا وبتحاول تخوّفنا أو تخلّينا نفقد الأمل.. بس احنا مش حنخاف ومش حنفقد الأمل.. علشان لسه في ناس تستاهل حياتهم تبقى أحسن، وفي ثمن ناس دفعته ولازم يتسدّد. في ناس كتير عايزة أكتب الحرية ليهم بالاسم (...) آلاف يستاهلوا الحرية وحيوصلولها لو احنا صدّقنا في قدراتنا وراجعنا غلطاتنا وقررنا إننا مش حننهزم.

من صفحة ماهينور المصري (عن فايسبوك)