حسام بهجت: مستمرّون

ألف ألف شكر جداً جزيل والله على كل هذا التضامن والمحبة اللي فرقوا معايا كتير في استقبال اليوم (...) طبعا قرار التحفظ على الأموال حركة واطية لكن متوقعة من نظام زي ده وشيء مقرف بلا شك، لكن يا جماعة بصراحة أنا حاسس إنكم اتضايقتم أكتر مني بكتير! أموال إيه بس وممتلكات إيه يا جماعة؟ دي حركات. وأنا من وقت بدء القضية الغبية دي من 7 شهور كتبت إيش ياخد الريح من البلاط؟ ولا إحنا عندنا حاجة ياخدوها ولا المنظمات اللي قرروا يقرفوها هتبطل تشتغل وتقرفهم، وعلى رأسهم وبكل فخر المبادرة المصرية اللي ما زالت حتّة من القلب طبعاً.
لو بيعاقبونا على اللي عملناه في السابق فأنا لا أشعر إلا بكل فخر على كل شيء عملته قبل وأثناء وبعد الثورة. ولو بيردعونا عن العمل في المستقبل فهم بكل بساطة واهمون لأن الرفاق في حركة حقوق الإنسان (باستثناء المنبطحين والمشتاقين والمكسور عينهم) أكيد مش هيقرروا بعد 30 سنة نضال إنهم يعتزلوا في أسوأ مراحل انتهاكات حقوق الإنسان في تاريخ البلد.
خطّتي في الأيام المقبلة انتظارا لما هو أسوأ (استدعاءات وتحقيقات مثلا أو إحالة للمحاكمة الخ) هو إني بكل بساطة هاكمّل شغلي في الصحافة اللي سعدت بالرجوع إليها من 3 سنين وما زلت مبسوط بشغلي فيها. فاللي عنده أفكار أو أسرار أو مستندات أو تسريبات أو عايز يقترح عليّ مواضيع لتحقيقات أنا كلي آذان صاغية (...)

عن صفحة Hossam Bahgat (عن فايسبوك)